ಭಾರತೀಯ ವಾಯುಪಡೆಯ ಮಿಂಚಿನ ರಕ್ಷಣಾ ಕಾರ್ಯಾಚರಣೆ – ಪಾಕಿಸ್ತಾನ ಸೇರಿ 10 ದೇಶಗಳ ಪ್ರಜೆಗಳಿಗೆ ಜೀವದಾನ
ಕೊಲಂಬೋ: ದಿತ್ವಾ ಚಂಡಮಾರುತದ ಭೀಕರ ಆಘಾತಕ್ಕೆ ಶ್ರೀಲಂಕಾ ಇಡೀ ನಲುಗಿ ಹೋಗಿದೆ. ಇದುವರೆಗೆ 218ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದು, ಸುಮಾರು 200–250 ಜನರು ಇನ್ನೂ ಕಾಣೆಯಾಗಿದ್ದಾರೆ. ಭಾರೀ ಮಳೆ, ಪ್ರವಾಹ, ಭೂಕುಸಿತ ಮತ್ತು ಪ್ರಚಂಡ ಗಾಳಿಯಿಂದ ಲಕ್ಷಾಂತರ ಕುಟುಂಬಗಳು ಮನೆ-ಬೀಡಿ ಕಳೆದುಕೊಂಡು ಬೀದಿಪಾಲಾಗಿವೆ. ಸರ್ಕಾರ ರಾಷ್ಟ್ರೀಯ ತುರ್ತುಸ್ಥಿತಿ ಘೋಷಿಸಿ, ಸೇನೆಯನ್ನು ಕಣಕ್ಕಿಳಿಸಿದೆ.
ಈ ಸಂಕಷ್ಟದ ಘಳಿಗೆಯಲ್ಲಿ ಶ್ರೀಲಂಕಾಗೆ ಮೊದಲು ನೆರವಿನ ಹಸ್ತ ಚಾಚಿದ್ದು ನೆರೆಯ ಭಾರತ. ಭಾರತೀಯ ವಾಯುಪಡೆಯು “ಆಪರೇಷನ್ ಸಾಗರ್ ಬಂಧು” ಆರಂಭಿಸಿ MI-17 ಹೆಲಿಕಾಪ್ಟರ್ಗಳ ಮೂಲಕ ದಿಟ್ಟ ರಕ್ಷಣಾ ಕಾರ್ಯ ನಡೆಸುತ್ತಿದೆ.
ಪ್ರವಾಹದಲ್ಲಿ ಸಿಲುಕಿದ್ದ ಸ್ಥಳೀಯ ಶ್ರೀಲಂಕನ್ನರ ಜೊತೆಗೆ ಹಲವು ವಿದೇಶಿ ಪ್ರವಾಸಿಗರನ್ನೂ ಸುರಕ್ಷಿತವಾಗಿ ಹೊರತಂದಿದೆ. ಆ ರಕ್ಷಿತ ಪಟ್ಟಿಯಲ್ಲಿ ಗಮನ ಸೆಳೆಯುವಂಥ ಹೆಸರುಗಳಿವೆ:
- ಪಾಕಿಸ್ತಾನ
- ಜರ್ಮನಿ
- ದಕ್ಷಿಣ ಆಫ್ರಿಕಾ
- ಸ್ಲೊವೇನಿಯಾ
- ಯುನೈಟೆಟೆಡ್ ಕಿಂಗ್ಡಮ್
- ಬೆಲಾರಸ್
- ಆಸ್ಟ್ರೇಲಿಯಾ
- ಇರಾನ್
- ಬಾಂಗ್ಲಾದೇಶ
- ಪೋಲೆಂಡ್
ಇವರೆಲ್ಲರನ್ನೂ ಭಾರತೀಯ ವಾಯುಸೇನೆಯ ಧೀರ ಜವಾನರು ಜೀವದ ಜೋಖಿಂಗೆ ನಿಲ್ಲದೆ ರಕ್ಷಿಸಿದ್ದಾರೆ. ಇದಲ್ಲದೆ ಕೊಲಂಬೋ ವಿಮಾನ ನಿಲ್ದಾಣದಲ್ಲಿ ಸಿಲುಕಿದ್ದ 24 ಭಾರತೀಯ ಪ್ರಜೆಗಳನ್ನು ಸುರಕ್ಷಿತವಾಗಿ ತಾಯ್ನಾಡಿಗೆ ಕರೆತಂದಿದೆ.
ದಿತ್ವಾ ಚಂಡಮಾರುತ ಈಗ ಬಂಗಾಳ ಕೊಲ್ಲಿಯ ಕಡೆಗೆ ಸಾಗುತ್ತಿದ್ದು, ತಮಿಳುನಾಡು ಮತ್ತು ಪುದುಚೇರಿಯಲ್ಲಿ ಧಾರಾಕಾರ ಮಳೆ ಸುರಿಯುತ್ತಿದೆ. ರಾಮನಾಥಪುರಂ, ನಾಗಪಟ್ಟಿಣಂ ಸೇರಿದಂತೆ ಹಲವು ಜಿಲ್ಲೆಗಳು ಜಲಾವೃತಗೊಂಡಿವೆ. ತಮಿಳುನಾಡಿನಲ್ಲಿ ಮೂವರು ಮಳೆ ಸಂಬಂಧಿತ ಘಟನೆಗಳಲ್ಲಿ ಸಾವನ್ನಪ್ಪಿದ್ದಾರೆ. ಈ ಚಂಡಮಾರುತದ ಪ್ರಭಾವದಿಂದ ಬೆಂಗಳೂರಿನಲ್ಲಿ ಇತ್ತೀಚಿನ ದಿನಗಳಲ್ಲಿಯೇ ಕಂಡಿರದ ತೀವ್ರ ಚಳಿ ಅನುಭವಕ್ಕೆ ಬಂದಿದೆ.
ಶತ್ರು-ಮಿತ್ರ ಎಂಬ ಭೇದವಿಲ್ಲದೆ, ಮಾನವೀಯತೆಯ ಕರೆಗೆ ಸ್ಪಂದಿಸಿ ಭಾರತೀಯ ವಾಯುಪಡೆ ತೋರಿದ ಧೈರ್ಯ ಮತ್ತು ಕರುಣೆಗೆ ಜಗತ್ತೇ ಮೆಚ್ಚುಗೆ ವ್ಯಕ್ತಪಡಿಸುತ್ತಿದೆ.